Жүрек тұсынан пышақ жарақатын алған аула сыпырушы оқиға орнында көз жұмды.
28 тамыз күні күндізгі уақытта 102 нөміріне автотұрақ маңында пышақ жарақатын алып, көз жұмған азаматтың денесі табылғаны турал хабарлама келіп түскен. Оқиға орнына дереу жеткен полицейлер мән-жайды анықтау шараларына кірісті. Белгілі болғаны, жұмыс уақытында екі аула сыпырушы өзара сөзге келіп қалған. Жанжал соңы төбелеске ұласқан. Оның бірі екіншісінің кеуде тұсына екі рет пышақ сұғып алған.
Ақтөбе облыстық Полиция департаментінің баспасөз қызметіндегілер қазіргі таңда күдіктінің ұсталғанын хабарлады және ол өз кінәсін мойындаған. Қазір ол қамауда. Бұл оқиғаға қатысты ҚР Қылмыстық кодексінің "Адам өлтіру" бабы бойынша іс қозғалып, сот алды тергеу жұмыстары жүріп жатыр.
