Кәмелеттік жасқа толмаған баланы зорлау фактісін жасырғандар да жазаға тартылатын болды. Себебі педофилия енді ауыр қылмыс санатына жатқызылды, деп хабарлайды Elitar.kz.
Бұл туралы елордада өткен брифингте ҚР Бас прокурорының орынбасары Марат Ахметжанов мәлім етті.
"Кәмелетке толмағандардың жыныстық тиіспеушілігіне қарсы жасалған қылмыстардың дәлелін жасырғандар да жауапкершілік арқалайтын болады. Педофилияның ауыр фактілері туралы хабарламағандар да жазаға тартылады. Бұл ауыр қылмысқа 6 жылға бас бостандығынан айыру жазасы қолданылады. Яғни, балаларға арналған мекемелердің басшылары, қызметкерлері баланы зорлау фактісін жасырса, жауапқа тартылады. Тура сондай жаза баланың ата-анасына және асыраушысына да қолданылатын болады",-деді Марат Ахметжанов ауыр қылмыстар үшін жазаны қатайту туралы заң жобасын таныстырған сәтте.
Естеріңізге салайық, бұған дейін Бас прокуратура өкілі елімізде педофилдерге өмір бойына бас бостандығынан айыру жазасы тағайындалатынын мәлімдеген болатын.
