Қазақстандық шенеуніктерге импорт тауарларды сатып алуға тыйым салынбақ, деп хабарлайды КТК арнасына сілтеме жасап Elitar.kz.
Нақтырақ айтқанда, бұл тыйым мемлекеттік тапсырыс сайты арқылы сауда-саттық жасайтын министрліктер мен әкімдіктегілерге арналмақ. Үкіметтің бұл қаулысы көпшілік талқысына қойылды.
Рұқсат етілмеген заттардың тізіміне импорт спорт киімдері, суға түсуге арналған костюм, төсек жабдықтары, тіпті сүлгіге дейін енген. Сонымен қатар, туфли мен резеңке етіктерден бастап шетелдік аяқ киімдер де бар. Одан өзге шенеуніктер кабинеттеріне қымбат итальяндық үстелдер мен орындықтар да сатып ала алмайды. Барлығы Қазақстанда жасалуы міндетті. Бұл шектеу екі жылға қойылған.
Еске салсақ, бұған дейін Премьер-министр Асқар Мамин шенеуніктерге шетелдік қымбат көлік алуға шектеу қойған болатын. Барлық мемлекеттік қызметкерлер тек Қазақстанда жасалған көлікпен жүруі тиіс.
Фото : Коллаж Zakon.kz
