Түркістан облысының полицейлері малын іздеп шығып, жардан құлап кетіп, 5 сағаттай жатып қалған тұрғынды құтқарды, деп хабарлайды облыстық полиция департаментінің баспасөз қызметіне сілтем жасап Elitar.kz.
Қазығұрт АПБ-нің кезекші бөліміне жергілікті тұрғыннан кешкі уақытта жайылымнан келмеген малын іздеп шыққан 60 жастағы анасы бірнеше сағаттан бері із-түссіз жоқ болып кеткені жөнінде хабарлама келіп түскен. Полицейдің анықтауынша, 1958 жылғы тұрғын сиыры келмеген соң кешкі сағат 18:00-дер шамасында өзі іздеп шығып кеткен. Арада бірнеше сағат өткен соң анасы келмегендіктен ұлы полицияға хабар берген. Содан малын іздеп шыққан жергілікті тұрғынды полицейлермен қатар көршілері, ағайын-туыстары бірлесіп іздеуге шықты.
"Түнгі сағат 23:30-дар шамасында әйелді табылды. Оның мал жайылымына барарда 3 метр тереңдіктегі жардан аяғы тайып құлап, жүре алмай отырғандығы анықталды. 5 сағаттан астам жарда жатқан апаның айтуынша, ол үйіне хабарласайын десе, ұялы телефоны үйінде қалып қойған. Жергілікті тұрғынның үйімен оқиға орнының арасы 1,5 шақырымнан астам қашықтықты құраған. Оқиға орнына тез арада жедел-жәрдем шақыртылып, зейнеткер ауруханаға жатқызылды" делінген хабарламада.
