Түркістан қаласында облыс әкімдігінің ұйымдастыруымен Қазығұрт ауданындағы жазатайым бала өліміне қатысты баспасөз мәслихаты өтті. Түркістан облысы әкімдігінің баспасөз қызметі берген мәліметке сенсек, бала өліміне қатысты жағдайдан соң бірқатар жауаптыларға шара көрілді.
«ҚР БҒМ-ң бұйрығы бойынша алгоритм негізінде орын алған жағдайлар туралы хабарлама 3 сағаттың ішінде тиісті білім саласындағы органдарды хабардар ету керек. Бұл жағдайда осы бұйрықтың орындалмағаны анықталды. Сондай-ақ, комиссия отырысының қорытындысымен кінәлі қызметкерлердің жауапкершілігі қаралады М.Әуезов жалпы орта мектебінің дене шынықтыру пәнінің мұғалімі Есенбеков Әбдіғаппар қызметінен уақытша шеттетілді. Мектеп директоры мен оның оқу ісі жөніндегі орынбасары Исаев Қанат Науханұлына қызметіне сәйкес еместігі, аудандық білім бөлімі басшысының орынбасары Егізек Алия Әлекбарқызына қатаң сөгіс, аудан әкімінің орынбасары Тұрсынқұлов Серік Алтынбекұлына сөгіс түріндегі шаралар көріледі. Одан өзге барлық білім беру мекемелерінің спорт залдарында орналасқан құрал жабдықтарға, оның ішінде шағын футбол және қол доптарына арналған торлы қақпаларды бекіту және оқушылар мен ұстаздарға қауіпсіздік ережелерін сақтау шаралары жүргізіледі. Сондай-ақ, мектеп оқушысының отбасына тиісті көмектер көрсетіледі», - деді Қазығұрт ауданының әкімі Төлеген Телғараев.
Түркістан облыстық адами әлеуетті дамыту басқармасы басшысының орынбасары Ардақ Садықованың айтуынша, басқарма тарапынан барлық білім беру ұйымдарындағы спорт және басқа да инвентарьларды бала қауіпсіздігіне тексеру жүргізу аудан, қала білім бөлімдеріне тапсырылып, сабақ кезінде қауіпсіздік шараларын сақтау қатаң тапсырылған.
Түркістан облыстық Полиция департаментінің тергеу басқармасының басшысы Қайбар Мәлік аталған оқиға бойынша сотқа дейінгі тергеу амалдары жүргізіліп жатқандығын айтты.
«Аталмыш жайт Қазығұрт АПБ-нің СДТБТ-ға ҚР ҚК-нің 141-бабымен «Балалардың өмiрi мен денсаулығының қауiпсiздiгiн қамтамасыз ету жөнiндегi мiндеттердi тиісінше орындамау» тіркеуге алынды. Қазіргі таңда аталған жайт бойынша сотқа дейінгі тергеу амалдары жүргізіліп, оқиғаның толық мән-жайы анықталуда», - деді Қайбар Мәлік.
Еске салсақ, Түркістан облысына қарасты Қазығұрт ауданы, Жаңабазар елді мекеніндегі М.Әуезов атындағы жалпы орта мектебінің 8 сынып оқушысына 5 қыркүйек күні сағат 10.00 шамасында дене шынықтыру сабағы барысында мектептің спорт залында футбол ойынына арналған жылжымалы қақпа үстіне құлап кетіп көз жұмды.
