Түркістан облысының әкімі Өмірзақ Шөкеев Үкімет отырысында Премьер-министр Асқар Маминге отандық банктердің Түркістанда жұмыс істеуге құлық танытпай отырғанын айтып шағымданды, деп хабарлайды Elitar.kz.
Үкіметтің кезекті отырысында онлайн байланыс арқылы сөз алған Өмірзақ Шөкеев Асқар Маминге банктерге тапсырма берілсе деген өтінішін жеткізді.
«Өзіңізге өткенде баяндағандай, бізде 233 жоба жиналып отыр, құны 70 млрд теңгеге. Жобалардың саны бойынша біз бірінші орындамыз. Ұсынылған жобалардың мақұлданғандары бойынша да біз бірінші орындамыз. 9 млрд 129 млн теңгені құрайтын алты жоба мақұлданған. Проблема: екінші деңгейлі банктер Түркістанға барып кәсіпкерлемен жұмыс істеу керек, филиал ашу керек. Біз оларды өткенде жинадық, сөйлестік. Біреуі де ашпай, бәрі «отказ» беріп отыр қазір»,-деді Өмірзақ Шөкеев.
Дегенмен Түркістан облысының әкімі қазіргі таңда Түркістанда Халық банк өз филиалын ашып жатқанын айтып, өзі атап өткен проблеманы шешудің жолын да ұсынды.
«Мен ойлаймын, Шымкентке келіп, осы жерде арнайы топ құрып, әр банк Түркістан облысы бойынша арнайы кредитті офицерлер бөліп бізбен жұмыс істесе. Жарайды, Түкрістанға бармай-ақ қойсын, Шымкентте істейік жұмысты олармен арнайы топ құрып. Соған тапсырма берілсе, жақсы болар еді. Сосын АКК (агро кредитті корпорация) Түркістанда нөл, жұмыс істеп жатқан жоқ. Бізде банк стандарттарына сай жасалған 480 дайын жобалар бар. Соған көңіл бөлсе олар. Жарайды Түркістанға бармай-ақ қойсын, Шымкентте бізбен жұмыс істесе екен. Біз олармен жұмыс істейтін болсақ, жобалардың бәрін еселеп көбейтеміз. 233 жобадан, тек 6-ақ жоба мақұлданған банкілермен», -деді Түркістан облысының әкімі.
Өмірзақ Естайұлының өтінішін тыңдаған Асқар Мамин екінші деңгейлі банктерге тапсырма берілетінін кесіп айтты.
«Жақсы, мен қарап отырмын, Шымкент арқылы жұмыс істеу керек. Банктермен сөйлесеміз, айтамыз оларға...», -деді Үкімет басшысы.
