11 наурыз, 16:20
Башқұртстан Республикасының тұрғыны Қазақстанға қонаққа келу үшін 400 мың рубльден астам қаржы (2,2 млн теңгеден астам) төлеген. Ол біздің елде халықаралық әйелдер күнін қарсы алмақ болыпты. Дегенмен, сапарға шығар алдында Қазақстанға келе алмайтынын білген. Оның себебі – қарыздары, деп жазады tobolinfo.kz.
Башқұртстан Республикасының сот приставтары бойынша федералды қызметтер басқармасының баспасөз қызметі хабарлағандай, Давлекан ауданаралық сот приставтары бөлімінде әйелге қатысты 5 атқарушылық өндіріс ісі қозғалған. Ол қаржы ұйымдарынан несиелер алып, қарызын қайтармаған екен. Несие бойынша жалпы қарызының көлемі 386 мың рубльге жетеді. Бұған қоса оған 50 мың рубль көлемінде атқарушылық шығын жазылған.
Соның нәтижесінде бұл әйелдің елден кету құқығы шектеледі. Қазақстанға сапары тоқтап қалатынын білген ол тез арада ақша тауып, қарызын толық өтейді.
Бұған дейін қарызын қайтармай жүрген әйелдің мұнша қаржыны тез арада қайдан тапқаны белгісіз, дегенмен, шұғыл әрекетінің нәтижесінде Қазақстанға сапары жалғасты.
