Мақтаралдық келіншек пен арызданушы медиациялық бітімге келіп, қылмыстық іс тоқтады. Бұл туралы Түркістан облыстық сотының баспасөз қызметіне сілтеме жасай отырып Elitar.kz хабарлайды.
Мақтарал ауданы, Мырзакент кентіндегі "Молдахан" базарында орналасқан сауда дүңгіршегінің сыртында ілулі тұрған балаларға арналған көйлектер мен бас киімді 1994 жылы туған азаматша ешкімге байқатпай үптеп кеткен. Сауда орнының иесі бұл туралы тәртіп сақшыларына арызданған. Полицейлер күдіктіні анықтап, үстінен ҚР ҚК-нің 188-бабы, яғни "ұрлық" бойынша қылмыстық іс қозғалған.
Сотқа дейінгі алдын ала тыңдау кезінде сотталушы өз кінәсін толық мойындап, жәбірленушіге шығынын өтеп, кешірім сұрағанын айтқан. Ұрланған тауардың иесі де сотталушымен медиациялық бітімгершілікке келгені туралы жазып, соттан қылмыстық істі тоқтатуды сұраған.
"Сот іс
құжаттарын зерттеп, ҚР ҚК-нің 68-бабына
сәйкес, сотталушыны қылмыстық жауаптылықтан
босатып, оған қатысты қылмыстық іс
бойынша іс жүргізуді тоқтатқан"-деп
мәлімдеді Түркістан облыстық сотының
баспасөз қызметі.
Қаулы заңды
күшіне енген.
