Шымкент қалалық мәслихатының кезектен тыс қырық алтыншы сессиясында қала әкімі Ғабидолла Әбдірахымов Шымкенттегі Астана даңғылын Нұрсұлтан Назарбаев есімімен атауды ұсынды, деп хабарлайды қала әкімдігінің баспасөз хатшысы.
«Мемлекетіміздің іргетасын қалаушысы, еліміздің Тұңғыш Президенті Н.Назарбаев өзінің салиқалы басшылығымен тәуелсіздік туын биікке көтерді. Ата заңымызды, рәміздерімізді, шекарамызды және рухани құндылықтарымызды қастерлей отырып мемлекетіміздің абыройын асқақтату жолында тарихи бастамаларды жүзеге асырды. Егемендігіміздің негізін қалаушы біздің Тұңғыш Президентіміз - барша қазақстандықтар мойындаған және халықаралық қоғамдастық тарапынан құрметке ие болған ұлы тұлға. Елбасымыздың есімін осылай ұлықтау біз үшін асқан мәртебе және қуаныш»,-деп атап өтті өз сөзінде Ғабидолла Әбдірахымов.
