Арыс тұрғыны Дина Мырзахметова келінінің әрекеті өзгелерге үлгі болса дейді. Айтуынша, Арыста болған жарылыс кезінде алтыншы перзентіне аяғы ауыр келіні Әйгерім Сембек бес немересімен бірге қауіпсіз аймаққа бас сауғалап қашқан. 26 жастағы келіншек шеттей баламен 12 шақырым қашықтықты жүріп өтіпті.
Жарылыс болған күні Әйгерім Сембек үйде балаларымен жалғыз өзі болған. Отбасының өзге мүшелері Алматыда шаруалармен жүрген.
Көпбалалы келіншек оқиға болған күнді аса қорқынышпен еске алды.
«Үйімізге жақын маңнан пойыз өтетін. Сол жақтан бірнәрсе құлаған екен ғой деп мән бермедім алғашқы снаряд жарылғанда. Екінші рет атылғанда қыздарым қатты қорқып, жылап кетті. Оларды сабырға шақырып, қолыма ілінген затты алып көшеге шықтық»,-деді жас келін.
Әйгерім жойқын жарылыс орын алған соң дереу ата-енесіне хабарласқан. Алматыда жүрген олар елмен бірге жүріп, қырдың басына шығу қажеттігін айтыпты. Сол сәтте жолдасы Алматыдан Шымкентке қарай жолға шыққан.
«Кенжелерім егіз. Оның бір сыңарын өзім көтеріп алып, екіншісін сегіз жастағы үлкен қызыма бердім. Алты жастағы қызым екі жастағы қызымды жетектеп жүрді. Солай бір-біріміздің артымыздан жүріп келдік. Оның үстіне өзімнің аяғым ауыр. Шынымды айтсам, аласапыран кезде ешкім ешкімге қарайтын шама болмады. Көмек беретіндер де. Қырға жақындай бергенде екінші қызымды көлік қағып кетті. Ол жол тек бір аяқ жол болатын. Қатты жылдамдықпен келе жатқан көлік тежегішті қанша басқанымен қызымды соғып өтті. Аллаға шүкір, қызым қатты жарақаттанбады. Бірақ шеттей балаларыммен қатты әбіржідік»,-деді ол.
Жарылыс басыламын дегенше шамамен бес сағат өтіп, келіншектің жолдасы Арысқа шұғыл жеткен. Кейін Шымкентке барған шеттей балалы отбасы әр туысының үйін бір паналап жүріпті.
Осы ретте Әйгерім Сембектің ата-енесі немерелерінің өмірі үшін жан таласқан келіндеріне алғысын жаудырып, батыр деген атқа лайық деп отыр. Тіпті оның ерлігі көпке үлгі болса деген тілегін де жасырмады.
Ал көз алдында тоқтаусыз жарылған снаряд дауысынан қатты шошынып қалған кішкентай қыздар әлі күнге дейін басыла алар емес. Шамамен бес сағаттай он екі шақырымды жаяу жүрген олар қатты күн өткен болу керек, ыстығы көтеріліп, кезекпен ауырып жатыр екен. Оның үстіне бұл отбасының үйінің ауласына түскен снарядтан баспананың тура ортаңғы тұсы құлаудың шақ алдында тұр екен.
Айта кетейік, Әйгерім Сембектің үлкені сегізде, ал кенже егіз қызы бір жаста. Өзінің алтыншы перзентіне аяғы ауыр, мерзімі алты айлық.
