Бүгін Нұр-Сұлтан қаласында ҚР Президенті Қасым-Жомарт Тоқаевты ұлықтау рәсімі өтеді, деп хабарлайды Elitar.kz.
Айта кетейік, бүгінгі ұлықтау рәсімі - Тәуелсіз Қазақстан тарихында өткен Президент сайлауларынан кейінгі алтыншы инаугурация. Бұған дейінгі ұлықтау рәсімдеріне тоқталсақ, Тұңғыш Президент алғаш рет 1991 жылы алғаш рет Алматыдағы Республика сарайында ант берген болатын.
Екінші ұлықтау рәсімі 1999 жылы 10 қаңтарда өтті. Ол кезде де Елбасы Н.Назарбаев ант берді.
Үшінші инаугурация 2006 жылғы 11 қаңтарында Ақордада өтті. Атап өтерлігі, жалпыхалықтық сайлау 2005 жылы 4 желтоқсанда өткен болатын, бұл жолы да айқын басымдықпен Тұңғыш Президент жеңіске жетті.
2011 жылы кезектен тыс сайлауда жеңіске жеткен Нұрсұлтан Назарбаевты ұлықтау рәсімі 8 сәуірде өткен еді. 2015 жылы ел тарихында алтыншы рет сайлау өтіп, ол кезде де жеңіске жеткен Елбасыны ұлықтау рәсімі сол жылдың 29 сәуірінде болды.
2019 жылдың 19 наурызында Елбасы Нұрсұлтан Назарбаев өз өкілеттігін тоқтату туралы шешім қабылдап, оның орнына Президент лауазымын уақытша атқару Қасым-Жомарт Тоқаевқа берілді. Тоқаевты ұлықтау рәсімі 20 наурыз күні болды. Ал бүгін 9 маусым, жексенбіде өткен сайлауда 70,96 пайыз дауыс жинап, жеңіске жеткен Тоқаевты ұлықтау шарасы өтеді.
Ұлықтау рәсімі барысында Орталық сайлау комиссиясы жаңа сайланған Президентке Қазақстан Республикасы Президентінің куәлігін тапсырады.
