4 қабатты заманауи ғимараттың құрылыс жұмыстары өткен жылдың қазан айында басталған. Биылғы жылдың желтоқсан айында пайдалануға беріледі, деп хабарлайды Түркістан қаласы әкімдігінің баспасөз қызметіне сілтеме жасай отырып Elitar.kz.
Түркістандағы №3 облыстық перинаталдық орталық 2007 жылдан бері халық игілігі үшін жұмыс істеп келеді. Бұл перинаталдық орталық Кентау қаласы, Созақ, Отырар аудандарынан келген аналарға да қызмет көрсетеді. Облыстың орталығы болып халық саны артқан тұста перзентханада орын тапшылығын болдырмау мақсатында жуық арада қосымша жаңа ғимаратты пайдалануға беру жоспарланып отыр.
Бүгінде аталған мекеменің оң жақ бөлігінен 150 орындық жаңа ғимараттың құрылысы жүргізілуде. Ғимараттың құрылысын мердігер «Эристайл Казахстан» ЖШС-нің өкілдері құрылысты қазан айында толықтай аяқтайтынына сенімді. Яғни, жаңа ғимаратта жаңа туған сәбидің үні естілетін күнде алыс емес.
