Биыл Түркістан облысы бойынша 131,1 мың гектар алқапқа мақта егілген. Алқаптан 340 мың тонна өнім алу жоспарлануда. Бүгінгі күнге облыс бойынша 1,44 мың гектар алқаптан 3,2 мың тонна мақта жиналып, өнімділік 21,8 ц/га құрап отыр.
Түркістан облыстық Өңірлік коммуникациялар қызметінің мәліметінше, Жетісай ауданы бойынша мақта егілген аумақ 45 028 гектар жерді құрап отыр. Қазіргі таңда аудан бойынша 1097,5 гектардан мақта жиналып, орташа өнімділік гектарына 21,6 центнерді құрады. Бұл туралы Түркістан облысы Өңірлік коммуникациялар қызметінің көшпелі баспасөз мәслихатында Жетісай аудандық ауыл шаруашылығы бөлімінің бас маманы Дастан Дүйсенбаев мәлімдеді.
Бас маманның айтуынша, тұқым сапасын арттыру - ауылшаруашылығы дақылдарынан мол өнім алудың бірден-бір жолы болып табылады. Осыған байланысты ауданда отандық шит дайындау жұмыстары жүргізілуде. Қазіргі таңда Жетісайда 3 тұқым шаруашылығы жұмыс істейді. Мемлекет тарапынан тұқым шаруашылығын қолдау шаралары да тиісті деңгейде жүргізіліп отыр.
