Оқушылардың қашықтан оқыту форматына көшуіне байланысты іске қосылған call-орталыққа сұрақ қоюшылар қатары көбеюде. Орталық жұмысымен танысқан Білім министрі онда оператор болып, ата-аналар сауалына жауап берді. Бұл туралы еліміздің бас педадогы өзінің Facеbook парақшасында жазды.
"Халықпен кері байланыс орнату — министрлік жұмысының маңызды бағыттарының бірі.
Біз өз тарапымыздан педагогтермен, ата-аналармен және сарапшылармен үнемі байланыста болуға тырысамыз. Азаматтардың конструктивті сауалдарына жылдам әрі мазмұнды жауап беру маңызды.
Әсіресе, төтенше жағдай кезінде біз коммуникацияның түрлі құралдарын пайдаланамыз.
Олар - дәстүрлі БАҚ, танымал интернет-платформалар, әлеуметтік желілердегі парақшаларымыз, Call-орталығы, онлайн-конференциялар, арнайы чаттар мен басқа да форматтар..." деп жазды министр.
Бұдан өзге Асхат Аймағамбетов өткен аптада түскі үзіліс кезінде орталықтың оператор қатарына қосылып, ондағы жұмыспен жіті танысқанын да атап өтті.
"Оқушылардың қашықтан оқыту форматына көшуіне байланысты call-орталықтың жаңа 1450 қысқа нөмірін іске қостық. Жедел желіге көптеген сұрақтар келіп түседі. Бұған өткен аптада түскі үзіліс уақытында орынбасарларыммен бірге өзім «оператор қатарында жұмыс істеп», көз жеткіздім.
Сұрақтардың басым бөлігі қашықтан оқытуға, жалақының қалай төленетініне қатысты болды.
Біз Call-орталығына түскен қоңырауларға мамандармен бірге бірінші басшылардың да жауап беруі тәжірибесін одан әрі жалғастыруды жоспарлап отырмыз. Бізге жалпы білім беру және ғылым жүйесі жұмысының тиімділігін үнемі арттырып отыру үшін әрдайым байланыста болу, ұсыныстар мен пікірлерді, тілектер мен ескертулерді естіп-біліп отыру — өте маңызды",-деді министр.
