Көлікті айдап кеткен азамат шымкенттік тұрғынның туысы болып шықты. Күдікті туысының көлігімен апатқа ұшыраған, деп хабарлайды Elitar.kz Түркістан облыстық Полиция департаментінің баспасөз қызметіне сілтеме жасап.
Жетісай АПБ-нің кезекші бөліміне Шымкент қаласының тұрғыны арызданады. Шағымданушы ер азамат өз арызында, болашақ қайынжұртының үйіне барып, көлігін үйдің сыртқы жағына қойып кеткенін, алайда қайта шыққанында автокөлігі жоқ екенін көрсетеді. Жәбірленушіге келтірілген шығынның жалпы көлемі 12 миллионнан астам теңгені құрайды.
"Аталған жайт сотқа дейінгі тергеп-тексерудің бірыңғай тізіліміне енгізіліп, ҚР ҚК-нің 200-бабы «Автомобильді немесе өзге де көлік құралын жымқыру мақсатынсыз құқыққа сыйымсыз иеленіп алу» бойынша тіркелді. Автокөлікті жымқыру жайтынан соң дәл осы түні 3-4 сағат өткеннен кейін орталық ауруханалардың біріне жол-көлік оқиғасы салдарынан дене жарақатымен бірнеше жас жігіттердің түскендігі туралы хабарлама келіп түседі. Аталған жайт ҚР ҚК-нің 345-бабымен «Көлік құралдарын басқаратын адамдарның жол жүрісі немесе көлік құралдарын пайдалану қағидаларын бұзуы» қылмыстық іс ретінде тіркелді" делінген ведомство хабарламасында.
Тексеру барысында үлкен тас жолы бойында автокөлікті басқарып келе жатқан жүргізуші жылдамдықты тым асырып, соның салдарынан көлікті игере алмай, электр бағанасына соқтығысқаны белгілі болды.
"Жол-көлік апатына түскен көлік аулада тұрып із-түссіз жоғалған жәбірленушінің көлігі екендігі анықталды. Ал көліктің кілтін рұқсатсыз алып, айдап кеткен күдікті жас жігіт бұған дейін де көлікті мас халде басқарғаны үшін жүргізуші куәлігінен айырылған болып шықты. Қазіргі таңда күдікті қамауға алынды" деді полициядағылар.
