Әлем бойынша бір күнде 73 мыңнан астам адам коронавирус жұқтырған.
Джон Хопкинс университетінің мәліметінше, 1 сәуір күнгі жағдай бойынша әлемде 859991 адам коронавирусқа шалдыққан. Оның 73185-і соңғы тәулікте тіркеліп отыр.
Қауіпті індеттен күні бүгінге дейін 42148 адам көз жұмған болса, оның 4324-і соңғы тәулікте қайтыс болған. Вирустан жазылып шыққандар — 178100 адамды құрады, оның 12493-і соңғы тәулікте емханадан шығарылғандар.
Айта кетейік, ақпан айында әлем бойынша тәулігіне 2-3 мың адам қауіпті індетті жұқтырған болса, соңғы үш күн ішінде олардың саны 128 мың адамға жетіп отыр. Джон Хопкинс университетіндегілер егер вирустың таралуы осы қарқынмен жалғаса берсе, апта соңына қарай коронавирус жұқтырғандар саны әлем бойынша 1 млн -ға жетеді деп болжап отыр.