11 қыркүйек, 15:00
Бүгін Түркістан қаласына өрттен зардап шеккендердің арнайы хал-жағдайын білу үшін ҚР Ішкі істер министрі, полиция генерал-лейтенанты Ерлан Тұрғымбаев пен ҚР Денсаулық сақтау министрі Елжан Біртанов келді.
Қос министр іссапар барысында бірден Түркістан облысының орталық ауруханасына барып, ауруханада күйік шалып жатқан ТЖҚ қызметкерлерімен тілдесіп, олардың дін-амандығы мен денсаулықтарының жақсарғанына көздерін жеткізді. Бұл туралы Түркістан облыстық Полиция департаментінің баспасөз қызметі хабарлады.
Айта кетейік, кеше, 10 қыркүйек шамамен сағат 18.25-те Түркістан қаласындағы "Роял-гранд" қонақүйінде өрт болды. Оқиға орнына полицейлер мен ТЖҚ қызметкерлері жедел жетіп, жақын маңдағы аумақтарды қоршауға алып, қонақ үйдің қызметкерлері мен қонақтарды эвакуациялады.
Өрттен құтқару жұмыстары барысында жалпы 50 адам қауіпсіз аймаққа шығарылды.
Өрт кезінде тәртіп сақшылары мен құтқарушылар өрт қаумалаған ғимараттан 4 жасар қызды және Түркияның екі шетелдік азаматын құтқарды. Қаза болғандар жоқ.
Өртті ауыздықтау барысында Түркістан облысы ТЖҚ-нің 5 қызметкері жарақаттанып, түрлі дәрежедегі күйіктерімен орталық ауруханаға жатқызылған. Олардың арасында жансақтау бөлімінде ауыр халде жатқан Түркістан облысы ТЖҚ ҚБ бастығының орынбасары азаматтық қорғау подполковнигі Бақытжан Абдугаппаров бар. Бүгінгі таңда оның жағдайы жақсарған.
"Қазіргі уақытта Түркістан қалалық полиция басқармасының тергеушілерімен қонақүйдің өртке орануы бойынша ҚР Қылмыстық кодексінің 292-бабы «Өрт қауiпсiздiгi талаптарын бұзу» бойынша сотқа дейінгі тергеп-тексеру амалдары жүргізілуде.
Сараптамалар тағайындалды. Тергеп-тексеру барысында оқиғаның барлық мән-жайы, оның ішінде өрттің шығу себебі анықталатын болады" делінген ведомство хабарламасында.
