Бас қала Нұр-Сұлтанның жаңа «мэрі» Алтай Көлгінов туралы не білеміз? Әдеттегідей ELITAR.KZ порталы назарларыңызға ашық дереккөздердегі мәліметтерге сүйене отырып топтаманы ұсынады.
41 жастағы Алтай Сейдірұлы - Түркістан облысының тумасы. Еңбек жолын 2000 жылы Қазақстан Қарулы күштерінде бастаған ол 35 жасында Орал қаласының әкімі қызметіне тағайындалды. Оның алдында БҚО басшысының орынбасары болды. 38 жасында БҚО әкімі қызметіне кірісті.
Алтай Көлгіновке БҚО әкімдігіндегі қызметі жұртшылық үшін танымалдылық әкелді деуге болады. 2017 жылдың басында отандық БАҚ беттерінде әкім Көлгіновтің құны 56 млн теңге тұратын қымбат көлік мініп жүргені туралы ақпарат шықты. Алғашында «Audi 8L»маркалы қызметтік көліктің бюджет есебінен сатып алынғаны айтылды. Кейін әкімдіктің баспасөз қызметі қымбат темір тұлпардың жалға алынғаны туралы ақпарат таратты. Ол үшін (жалға алу құны) айына 50 мың теңге төленіп келген.
Сәнді көлік мінемін деп ел аузында қалған Көлгінов үшін өзінің аты аталған дау мұнымен бітпеді.
2017 жылдың желтоқсанында Алтай Көлгінов Аралтал елдімекеніндегі мектептің ашылу салтанатына қатысты шудың ортасында қалды. Жергілікті басылымның (Уральская неделя) мәліметінше, шенеунік құрылысы әлі бітпеген білім ордасының лентасын қимақ болыпты.
Елорданың су жаңа әкімі Твиттер желісіне 2017 жылы тіркелген. Белсенділігі де жаман емес. Президент Тоқаевтың әкімдерге әлеуметтік желілерде белсенді жұмыс істеу керектігі жөніндегі тапсырмасынан соң Көлгінов INSTAGRAM парақшасын ашты. Онда тұрғындарды қабылдау, түрлі нысан құрылысы барысындағы, спорт пен өнер иелерін құттықтаған сәттерінен фотоларды көруге болады. Мәселен, жуырда ғана Ресейді мойындатқан қазақ баласы Ержан Максимді арнайы қабылдап, оған қазақтың қара домбырасын сыйға тартты.
Ерекше дауысты Ержан Максимнің анасы ұлының ресейлік додаға барып қатысуы дәл осы әкім Алтай Көлгіновтың арқасында екенін айтып, алғысын жеткізген болатын.
Айтпақшы, «Болашақ» түлегі Алтай Көлгінов INSTAGRAM парақшасын үш тілде жүргізіп отырады. Ара-тұра селфилетіп, оқырмандарына күннің сәттілігін де тілеуді ұмытпайды.
Алтай Көлгіновтің жаңа қызметі туралы желі қолданушылары не ойлайды? (Бұл туралы жоғарыда келтірілген видеодан көре аласыздар)
Айтпақшы, Алтай Көлгінов тілшілерге берген бір сұхбатында мемлекеттік қызметті екінші жоғары білім алумен теңеген болатын.
Не дейміз, су жаңа креслоға отырған әкімге "Нұр Сұлтан" деген оқу орнында "екі" деген баға алмай, үздік "диплом" алып шығуына тілектеспіз.
