Депутат Шакир Хахазов Парламент Мәжілісінің жалпы отырысында осылай деді. Ол өзге депутаттармен бірге ҚР Әділет министрлігінен қате жазылған жеке сәйкестендіру нөмірлерін (ЖСН) түзету үшін тиісті шараларды қабылдауды сұрады.
ЖСН-ді түзету туралы Парламент Мәжілісінің депутаттары Әділет министрі Марат Бекетаевтың атына депутаттық сауал жолдады.
«Заңға сәйкес, ЖСН дегеніміз - ол жеке тұлғаға бір рет және өмір бойына берілетін цифрлық код. Дегенмен, заң мен заңға қосымша актілерде қателіктер болған жағдайда ЖСН-ді түзету туралы ешқандай норма жоқ. Азаматтар түзетуге барған кезде, мұндай ереженің жоқтығы салдарынан ХҚКО қызметкерлері тарапынан тисті қадамдар жасалмайды. ЖСН беру кезіндегі қателіктен адамдар жылдар бойы өздерінің жасын, тіпті жынысын дәлелдеуге тырысып келеді», - деді депутат Шакир Хахазов.
Депутат құжаттағы қателікке бола кездесетін кедергілерді санамалай келіп, нақты мысалдарға тоқталды.
«Жеке
кәсіпкер Еркін Бектенбаев өз бизнесін
жабуға мәжбүр болды. Себебі оның
ЖСН-інде қателікке жол берілген, яғни
жазылған сандар оның туған күніне сәйкес
келмей қалған. Осыған байланысты Сатып
алу порталы оны саудаға қатысушы ретінде
тіркемеген. Кәсіпкер әділет органдарына
ЖСН-ін өзгерту туралы бірнеше мәрте
өтініш жасаған. Мәселе заңдық күші жоқ
құжаттарды берумен ғана шектелген», -
деді ол.
Сондай-ақ қарағандылық Наталья Шубичук 2018 жылы жоғалған жеке куәлігін ауыстырғаннан кейін, өзінің 143-те емес, 43 жаста екенін дәлелдеумен әлек болған.
«Нұр-Сұлтан қаласының тұрғыны Майра Мырзағали ХҚКО-дағы қателік салдарынан ер азамат ретінде көрсетілген. Е-gov жүйесі оның ЖСН-ін осылай белгілеп тұр», - деді депутат.
Аталған жағдайларға байланысты, депутаттар тарапынан әділет органдарына жеке тұлғаның өтініші бойынша ЖСН-ді түзету құқығын беруді және қызметтік тергеу жүргізу тәртібін белгілеу, сондай-ақ қате мәліметтер енгізгені үшін әділет органы қызметкерлеріне жауапкершілік шараларын күшейту қажеттігі айтылды.
Бұл мәселе бойынша Egov.kz порталында құжаттарға түзету, нақтылау, өзгертулер және түзетулер енгізу үшін тұрғылықты жері бойынша өтінішпен АХАЖ бөліміне жүгіну қажеттігі айтылады. Сондай-ақ, өтінішке әдетте құжаттарға түзетулер немесе өзгертулер енгізу қажеттілігін растайтын құжаттар қоса беріледі делінген.
