ЭКСПО кезінде Қазақстанға жұмыс істеуге келіп, Павлодар тұрғынынан аяғым ауырлап, бала босандым деп айтқан конголық Моника Камукенж Канганзаның айтқандары дәлелдерге сай келмей шықты, деп хабарлайды Elitar.kz.
КТК арнасының "Астарлы ақиқат" бағдарламасы Конго тұрғынының өз елінен жүкті болып келгенін анықтады.
Конголық келіншек сәбиімді айы мен күні келіп, 9 айлығымды алып келдім дегенді алға тартты. Яғни, Мониканың қызы Блессинг 2018 жылдың тамызында дүниеге келген. Ал Мониканың өзі шекара арқылы Қазақстанға 2017 жылдың желтоқсан айында өткен. Демек, қара нәсілді келіншек баласын қараша айында көтерген.
"Желтоқсанның 27-іне Моника Қазақстанға келген. Мөртаңба тұр. Блессинг 17 тамызда өмірге келді. Егер оны 9 ай көтерген болсаңыз, сіз оны қараша айында көтергенсіз. Демек, Қазақстанға сіз жүкті болып кірдіңіз. Деректер мен дәйектер осы. Мен ештеңені ойдан шығарып отырған жоқпын. Тек осыны мойындаңыз.Сіздің ауыр жағдайыңызды түсінеміз. Біз сізге шын мәнінде көмек көрсетеміз. Егер жалған айтсаңыз, сізге көмектесу мүмкін болмайды", - деді бағдарлама жүргізушісі Дина Төлепберген.
Алайда Моника қазақ жігітінен жүкті болдым деген сөзінен таймай, Қазақстанға жүкті болып келмедім деп отыр.
"Мен баланың анасымын ғой. Мен ондай мәселелермен кездейсоқ келген жоқпын. Баланы қашан туғанымды білемін. Конго елінде аяғым ауыр болмады", - деді конголық азаматша.
Қызының әкесі павлодарлық Мәулен есімді жігіт екен. Бірақ оның телефон нөмірін білмейді. Хат-хабарсыз кеткен. Тіпті бейнесі де еміс-еміс есінде қалыпты.
Еске салсақ, осыдан біраз уақыт бұрын Моника Камукенж Қазақстанға жұмыс істеуге келіп, мейрамханаларда биші болып істеген. Кейін қазақ жігітімен танысып, содан бала босанған мәлімдеді. Және де ол Конго еліне қайтқысы келмейтінін, сондықтан Қазақстан елінде қалғысы келетінін айтып елден көмек сұрады.
