Клизма арқылы жіберілген ыстық судан күйіп қалған балаға қатысты жауапты қызметкерлерге қатаң шара көрілді. Қалалық инфекциялық аурухананың бас дәрігеріне әкімшілік жаза ретінде 45 айлық есептік көрсеткіш ретінде айыппұл салынды. Бұл туралы бүгін еліміздің ДСМ Қоғамдық денсаулық сақтау комитетінің төрағасы Жандарбек Бекшин мәлімдеді.
Клизма қабылдау кезінде күйіп қалған балаға қатысты арнайы баспасөз мәслихатын ұйымдастырған жауаптылар материалдардың процессуалдық шешім шығару үшін құқық қорғау органдарына жіберілгенін жеткізді. Комитетінің төрағасы аталған факті бойынша екі медбике жұмыстан шығарылған және аға медбике қызметінен алыныпты. Бас дәрігердің орынбасары мен емдеуші дәрігерге қатаң сөгіс жарияланған.
Айта кетейік, наурыздың аяғында инфекциялық ауруханада 10 айлық сәбиге ыстық сумен клизма жасалып, тік ішегі күйген болатын. Зардап шеккен сәби Алматыда ем қабылдап жатыр. Қазір баланың жағдайы тұрақты деп сендіреді дәрігерлер. Алайда, ыстық судан оң жақ жамбасы мен тік ішегі күйген. Бала консервативті ем қабылдауда. Дәрігелер баланың жағдайы бері қарап келеді деп отыр. Қазір Денсаулық сақтау министрлігі бүлдіршіннің жағдайын қатаң бақылауға алған.
