Оңтүстік Кореяда 7 жастағы кішкентай баланы қағып кетіп, елден кетіп қалған Қазақстан азаматы Сеул қаласына өз еркімен ұшып келіп, баланың ата-анасынан кешірім сұрады. ҚР Сыртқы істер министрлігінің баспасөз қызметінің мәліметінше, ол тергеу шараларына қатысады.
«Қазақстан Республикасы азаматының Кореяға келу барысы елшілік қызметкерлерінің бақылауында өтті. Дипломаттар жеке сұхбат барысында оның құқықтарын түсіндіріп, тергеу кезінде өзін қалай ұстауы керектігі туралы кеңес берді. Қазіргі уақытта отандасымыз Чангвон қаласының тергеу изоляторында қамауда отыр. Елшілік бұл мәселені ұдайы бақылауда ұстайды" делінген хабарламада.
Естеріңізге сала кетейік, бұл оқиға биыл қыркүйек айында күндізге уақытта Кёнсан-намдо провинциясының Чангвон қаласында орын алды. Тергеушілердің мәліметінше, қатты жылдамдықпен келе жатқан қазақстандық жүргізуші баланы қағып кеткен. Одан кейін тоқтап, баланың құлағанын көреді де дереу оқиға орнынан ізін суытқан. Екі шақырымнан кейін ол көлікті тастап, Инчхон әуежайына жол тартады. Келесі күні таңертең Өзбекстанға, кейін Қазақстанға ұшып келеді. Көлік тіркелмегендіктен, күдіктіні анықтау үшін тергеушілерге біршама уақыт қажет болған. Күдіктінің есімі дүкенде пайдаланған банк карточкасының көмегімен анықталыпты. Күдікті жиырма жаста, оның бойы – жүз сексен сантиметрге жуық.
Ал зардап шеккен баланың миына қан құйылып, басына ота жасалды. Баланың әкесі қылмыскерді ұстау туралы өтінішпен ел Президентіне жүгінді. Күдікті Кореяда заңсыз жұмыс істеп жүрген. Ол бұл елге өткен жылдың шілде айында турист ретінде келген.
