Сарыағаш ауданының құрғыны Балтабай Құрбанбаев Павловния ағашын өсіруді қолға алды. Ол 2017 жылы Қытай елінен 50 мың түп алдырып, аудандағы бос жатқан 2 гектар жерге отырғызған. Кәсіпкер бұл дарақ ең бағалы ағаштардың бірі деп отыр. Бұл туралы Түркістан облысы әкімдігінің баспасөз қызметі хабарлады.
«Павловния ағашы әлемдегі ең жылдам өсетін ағаш деп айтуға болады. Жылына 4-6 мертге дейін өссе, ал бойы 25 метрге дейін жетеді. 6 апта гүлдеп тұрады. Еуропа елдерінде жиһаз жасауға осы ағашты қолданады. Одан бөлек, қайық, шаңғы, тенис ракеткасын, музыкалық аспап тағы басқа да бұйымдар дайындауға да таптырмайтын дүние. Бұл ағашта көз болмайды. Өте иілгіш келеді. Бастапқыда адамдар мұндайға сеніңкіремей қараған. Қазір жан-жақты көз жеткізіп, көшеттерін алып көбейтуді ойластыруда. Түсінген адамға мұның пайдасы ұшан-теңіз», – деді Балтабай Құрбанбаев.
Кәсіпкердің сөзінше, еліміздің оңтүстік өңірінің климаты Павловния ағашын өсіруге өте қолайлы. Күтімі жақсы болса, 3 жылдан кейін ағашты қажетке жарата беруге болады.
