Ұлттық банк валюта нарығындағы ахуалға қатысты түсінік берді, деп хабарлайды Ұлттық банктің баспасөз қызметіне сілтеме жасай отырып Elitar.kz.
Валюта нарығындағы ахуал тұрақты және теңге бағамын төмендетуге негіз жоқ деп мәлімдеді Ұлттық банктегілер.
«Қазақстан Ұлттық Банкі және екінші деңгейдегі банктер халық және бизнес тарапынан сұранысты қанағаттандыру үшін қолма-қол, сол сияқты қолма-қол емес шетел валютасының жеткілікті қорына ие. Қазақстан Ұлттық Банкі банк жүйесін шетел және ұлттық валютасының қажетті санымен уақтылы толықтырып отыруға дайын» делінген хабарламада.
Егер де валюта айырбастау пунктерінде бағаны көтеру жағдайлару туындаса, Қазақстан Ұлттық Банкінің филиалдары нарықты тұрақтандыру бойынша қажетті жедел әрекет қабылдауға дайын.
Ұлттық Банк ықтимал шығындарды болдырмау үшін валютаны сатып алу мен сату бойынша баға белгілеудің айырмасында, сол сияқты теңгенің валюталық бағамын түзету нәтижесінде де алыпсатарлық валюталық операцияларды жүзеге асырмауды ұсынады. Сондай-ақ, Ұлттық Банк қолма-қол шетел валютасы нарығындағы ахуалды бақылап отыр.
Айта кетейік, бүгін қазақстандықтар доллар бағасының көтеріліп, теңге құлдырағанын әлеуметтік желілерде жазып, өзара сары уайымға салынған болатын.
