Денсаулық сақтау министрі Елжан Біртановтың мәліметінше, Алматыдағы медициналық мекемеде дәрігерлердің қауіпті індетті жаппай жұқтыруына байланысты тексеру шаралары қолға алынды. Тексеру жұмыстарына тәжірибелі эпидемиолог мамандар тартылған.
"Орталық қалалық клиникалық ауруханада коронавирус таралуына байланысты: менің тапсырмам бойынша Денсаулық сақтау вице-министрі Камалжан Надыров пен Тауарлар мен қызметтер қауіпсіздігі және сапасын бақылау комитеті басшысының орынбасары Нұрхан Сәдуақасов Алматының денсаулық сақтау басқармасы басшысымен бірге "Көктем" шипажайында жатқан клиника қызметкерлерімен кездеседі. Барлық сұрақ пен мәселелер эмоциясыз заң бойынша шешіледі деп сенемін. Менің тапсырмам бойынша Алматы медициналық ұйымдарында инфекцияның таралуын тексеруді тәжірибелі эпидемиолог, ҚКБТУ төрағасының орынбасары Н. Сәдуақасов басқаратын болады", - деп жазды министр Facebook парақшасында.
Еске салсақ, күні кеше Алматыдағы орталық клиникалық аурухананың 100-ден астам қызметкерінен коронавирус инфекциясы анықталды. Салдарынан медициналық мекеме карантинге жабылды.
