Қазақстанның "Ұлттық банкі" монеталардың дизайнын өзгертіп шығарды, деп хабарлайды ҚР ҰБ баспасөз қызметі.
Қазақстан Республикасының Ұлттық Банкі 2019 жылғы 26 сәуірде 2019 жылғы үлгідегі дизайны өзгертілген номиналдық құны 1, 2, 5, 10, 20, 50 және 100 теңгелік монеталарды айналысқа шығарады.
Монеталардың дизайнын Қазақстан Республикасының Президенті Қ. Тоқаев 2019 жылғы 20 наурызда мақұлдады.
Мемлекеттік тілдегі «ҚАЗАҚСТАН» деген сөз латын графикасының негізіндегі әліпби пайдаланыла отырып «QAZAQSTAN» деп жазылды.
Айналыстағы
монеталардың сырт жағында (реверсінде)
«QAZAQSTAN» деген сөзі бар Қазақстан
Республикасының Мемлекеттік Елтаңбасы
бейнеленген, сондай-ақ шығарған елді
білдіретін «QAZAQSTAN RESPÝBLIKASY» деген жазу
бар.
Айналыстағы
монеталардың бет жағында (аверсінде)
монеталар номиналының цифрлық бейнеленуі,
сондай-ақ ұлттық валютаның «TEŃGE» деген
атауы мен шығарған банк атауының
қысқартылған белгісі «QUB» (Qazaqstan Ulttyq
Banki) бар мәтіндік жазулар орналасқан.
2019 жылғы үлгідегі дизайны өзгертілген номиналдық құны 100 теңгелік айналыстағы монеталардың қырында (гуртында) «JÚZ TEŃGE» деген жазу бар.
Назар аударыңыз!
Айналыстағы монеталардың техникалық және заттай өлшемдері: массасы, диаметрі, қалыңдығы, металл құймасы өзгеріссіз сақталған. Төлем терминалдарын және басқа да кассаны қосымша қайта теңшеу талап етілмейді.
Ескі және жаңа үлгідегі айналыстағы монеталар заңды төлем құралы болып табылады және барлық төлем түрлері бойынша қабылдануға міндетті!
