Түркістан облысының полицейлері жабайы қоян аулаған браконьерлерді ұстады, деп хабарлайды ведомствоның баспасөз қызметіне сілтеме жасай отырып Elitar.kz.
"Экологиялық қылмыс пен құқықбұзушылықтарды анықтауға және жолын кесуге бағытталған «Браконьер» жедел-профилактикалық іс-шарасы барысында Созақ ауданының 3 тұрғыны 3 бас жабайы қояндарды ұстау кезінде қолға түсті. Күдіктілер ерекше қорғалатын табиғи аумақта құжаттары жоқ «Урал» маркалы мотоциклін және арнайы прожектор құрылғысын қолданып, ТОЗ-16 моделді мылтығымен заңсыз аң аулаған. Созақ АПБ-не жеткізілген күдіктілерден айғақты зат ретінде мылтық пен 19 дана патрондары және 3 қоянның өлі денелері тәркіленіп алынды" делінген баспасөз хабарламасында.
Аталған жайт ҚР ҚК-нің 337-бабы «Заңсыз аңшылық» бойынша тіркелген. Күдіктілер өз кінәларын толық мойындаған.
