Түркістан облысының әкімі Өмірзақ Шөкеев күрделі жөндеуден өткен Шардара қаласындағы көпқабатты үйлердің тұрғындарымен кездесті. Өз сөзінде аймақ басшысы Шардараны дамытуға күш салынатынын, аудандағы ауыз су мәселесі кезең-кезеңімен шешімін табуып, көпқабатты үйлерге көгілдір отын жеткізу жоспарға сай іске асатынын уәде етті.
Түркістан облысы әкімдігі баспасөз қызметінің мәліметінше, Өмірзақ Шөкеев Шардара ауданына жұмыс сапары барысында Ақберді елдімекеніндегі ГРС-18 газ тарату стансасында болды. Бүгінде аудан халқының тең жартысы газбен қамтылған. Алдағы 4 жылда тағы 16 елді мекенге көгілдір отын жеткізіліп, Шардара ауданы 96,8%-ға табиғи газбен қамтамасыз етіледі.
Өмірзақ Естайұлы аудандағы бірқатар кәсіпорындарды аралап, жаңа жобалармен танысты. Атап айтқанда, Еуропа нарығына балық экспорттаудың көзін тапқан зауытта болды. Кәсіпорын мұздатылған сазан мен көксерке балығын Германия, Дания, Литва мен Ресейге экспорттайды. Зауыт алда кеңейтіліп, қақталған балық және балық жемі мен майын шығармақ. Сонымен қатар өңір басшысы Достық ауылдық округінде орналасқан қауынғақ өнімдерін шығаратын кәсіпорнын жобасының жетекшілерімен жүздесті. Жаңа өндіріс орны неміс технологиясының көмегімен тәулігіне 1,5 тонна қауынғақ өнімдерін шығарады. Ол үшін өңірде барлық қолайлы жағдай жасалған.
Өмірзақ Естайұлы жұмыс сапары барысында инвесторлар тарапынан жүзеге асып жатқан жобалармен де танысты танысты. Көрші Өзбекстан мемлекетінің кәсіпкерлермен бірлескен жоба жаңа технологияларды қолдану арқылы мақта дақылын өсірумен айналысуды қолға алған.
