Бұл туралы Елбасы Нұр-Сұлтанда өткен XII Астана экономикалық форумында айтты, деп хабарлайды Elitar.kz.
"Көшбасшы мен халық біртұтас, ал әзірленіп жатқан бағдарламалар мен идеялар халықтың толық қолдауымен жүзеге асырыла бастаған кезде табыс болуы мүмкін. Бізде осылай болды, бәлкім, саясат дұрыс болды. Мен бес жалпыхалықтық сайлауға қатыстым, маған электораттың 85 пайызынан кем дауыс беріп көрген емес. Келесі трансформация тыныш, саяси сілкіністерсіз өтті. Менің ойымша, бұл жағдайдан дұрыс жолмен шыға білу керек. Менің мандатым әлі де жалғасты, аяқталмады. Мен әлі де жұмыс істей берер едім. Тіпті өз кандидатурамды 100 пайыз сеніммен қойып, мені бүкілхалықтық сайлауда қайта сайлайды дегенге сенімдімін. Бірақ өзгерістер қажет, жаңа ұрпақ қажет", - деді Назарбаев қатысушыларға.
Елбасы жаңа президент пен оның командасы елге жаңа өзгеріс, жаңа серпін әкелетініне сенім білдірді.
"Көріп отырсыздар, мен спикерлер үшін қандай да бір қолайсыздық туғызамын, алдымен "Тұңғыш Президент", содан кейін "Президент" деп айтуға тура келеді. Осындай жағдай. Менің ойымша, Қазақстанда екіжақтылық болмайды. Бір Президент бар және ол басты. Біз оны сайлағанда соған жұмыс істейтін боламыз", - деді Назарбаев.
Естеріңізге сала кетейік, Нұр-Сұлтанда XII Астана экономикалық форумы өтіп жатыр. Оның жұмысына 74 елден 5 мыңнан астам сарапшы, саясаткерлер, бизнесмендер мен ғалымдар қатысады.
