Коронавирусқа қатысты тұрғындар шу көтерген Зайсан ауданына жаңа әкім тағайындалды

24 ақпан, 13:35

Шығыс Қазақстан облысының әкімі Даниал Ахметовтің өкімімен Зайсан ауданының әкімі болып Серик Зайнулдин тағайындалды.

Әкімдіктің баспасөз қызметінің мәліметінше, Серік Зинабекұлы Зайнулдин 1964 жылы 25 ақпанда Зайсан қаласында дүниеге келген. Семей зооветеринарлық институтының зоотехник факультетін бітірген.

Еңбек жолын Зайсан ауданы совхоздарының бірінде зоотехник болып бастады. Совхоз директоры, аудандық ауыл шаруашылығы басқармасының бастығы, Зайсан ауданы әкімінің орынбасары қызметтерін атқарды.

2004-2005 жылдары — Зайсан ауданы әкімінің міндетін атқарушы, 2007-2010 жылдары-Шығыс Қазақстан облысы Катонқарағай ауданының әкімі, 2010-2013 жылдары — Зайсан ауданының әкімі, 2013 жылдың маусымынан Шығыс Қазақстан облысы Үржар ауданының әкімі қызметтерін атқарған.

Еске салсақ, өткен аптада Зайсан ауданының халқы коронавирус қатысты елді дүрліктірді. Желіде коронавирус жұқтырған қытайлықтар Сарытерек пен Айнабұлақ ауылдарында оқшауланатын болыпты деген ақпаратты естіген тұрғындар көшеге шығып, шу шығарды. Наразылық орын алған күні аудан әкімі халықтың қасынан табылмады. Осы жағдайдан соң аудан әкім Серік Ақтанов қызметінен босатылды.