Түркістан облысы, Шардара ауданының тұрғыны ауылдас танысына алданып қалған. Сеніміне кірген күдікті тұрғынға 3 млн теңге несие шығарып беремін деген. Бірақ ол қызметі үшін алдын ала 420 мың теңге алған.
Шардара тұрғыны аудандық полиция бөліміне ауылдасы банктерде танысы барын айтып, мал бордақылау кәсіпкерлігін дамыту үшін 3 миллионнан астам теңге шығарып береміз деп 420 мың теңгесін алғаннан кейін, ешқандайда несие алып бермеген айтып шағымданып келген. Жәбірленушінің айтуынша, алаяқ осы уақытқа дейін несиені әні шығарамыз, міне шығарамыз деп созып жүре берген. Амалы таусылған ер азамат несие түгілі өз ақшасын ала алмағаннан соң араға 3 жыл салып барып, полицейлерге арызданған.
"Аталған жайт Шардара АПБ сотқа дейінгі тергеп-тексерудің бірыңғай тізіліміне енгізіліп, ҚР ҚК-нің 190-бабы бойынша тіркелді.
Алаяқты қолға түсіру мақсатында аудандық полицейлер тез арада іске кірісіп, қажетті деп танылған барлық іс-шараларды іске асырды. Нәтижесінде күдіктіні өз үйінен ұстады. Сондай-ақ, тәртіп сақшылары күдіктінің бұрында алаяқтық жасап, 3 жылға шартты мерзімге кесілгенін анықтады. Сотқа дейінгі тергеу барысында күдікті өз кінәсін толық мойындады. Іс сотқа жолдануда",-деді Түркістан облыстық полиция департаментіндегілер.
