Алаяқтық жолмен оңай табысқа кенелгісі келген нұр-сұлтандық бойжеткеннің жасы 19-да. Бұл туралы елордалық Полиция департаментінің баспасөз қызметіне сілтеме жасай отырып Elitar.kz хабарлайды.
Бойжеткен INSTAGRAM желісінде аккаунт ашып, онда косметика тауарларын сатушы ретінде алаяқтық жасап келген.
Парақшаға түрлі косметикалардың фотолары мен жеңілдіктер туралы мәлімет жазып, көпшілікпен бөлісіп отырған. 19 жастағы ару қызығушылық танытқандардан алдымен киви-әмиян арқылы тауар ақысын төлеуді талап етіп отырған. Алайда оңай жолмен олжаға кенелгісі қыздың бұл қулығы ұзаққа бармады.
25 жастағы Нұр-Сұлтан тұрғыны бойжеткеннің қулығына ілініп, 250 мың теңгесінен айырылып қалған. Дереу полицияға шағым түсірген. Қазіргі уақытта ҚР Қылмыстық кодексінің 190-бабы (алаяқтық) бойынша сотқа дейінгі тергеу амалдары жүргізілуде.
Осы ретте полицейлер интернет арқылы тауар сатып алушыларға барынша мұқият болуға шақырады. Алаяқтарды мына белгілер арқылы тануға болады:
- сатушының телефоны мен мекенжайының жазылмауы;
- сатушы көбінесе тек жазысып байланыс ұстап отыруды жөн көреді;
- тауардың бағасы ұқсас тауарлардан қарағанда тым арзан келеді.
Егер сіз ғаламтор арқылы тауарға тапсырыс бергіңіз келсе, бірінші кезекте тауардың барына көз жеткізіп алыңыз, сатушымен сауда барысын видеобайланыс арқылы талқылаңыз. Сонымен қатар тауарды алғаннан кейін ақшасын төлеңіз.
