Тәртіп сақшыларымен бірге еріктілер де сайлаушылар тізімін жаңарту шарасына қатысады.
Акция президенттік сайлауға дайындық ретінде сайлаушылар тізімдерін жаңарту мақсатында өткізілуде, деп хабарлайды қала әкімдігінің ресми сайты.
Нұр-Сұлтанда аула аралау шарасы 15-29 сәуір аралығында өтеді. Басты мақсаты – сайлаушылар тізімін жаңарту.
«Сәуірдің 15-і мен 29-ы аралығында полиция қызметкерлері (400 адам) мен елордалық ЖОО мен колледж студенттерінің қатысуымен (400 адам) аулалық және пәтерлік аралау бойынша науқан ұйымдастырылады. Еріктілер барлық тұрғындарды тіркеу фактісі арқылы нақтылай отырып, олардың нақты тұрғылықты жерін көрсетіп, қайта жазады және жеке тұлғалар туралы Мемлекеттік деректер қорының тізімдерімен салыстырылады. Бұл мәліметтер аудандық әкімдіктерде жинақталып, сайлаушылар тізіміне түзетулер енгізіледі», – деп мәлімдеді дүйсенбіде өткен брифингте Нұр-Сұлтан қаласы әкімі аппараты басшысының орынбасары Азамат Ахмеджанов.
Аралау кешкі уақытта жүргізіледі, еріктілерде міндетті түрде жеке басын куәландыратын бейдж болуы керек. «Еріктілердің міндеті – пәтерлерге кіріп, қала тұрғындарына бірінші кезекте олардың қандай құқықтары бар екенін және қай жерде дауыс бере алатындарын түсіндіру. Сондай-ақ, сайлаушылар тізімінде аталған адамның бар-жоғын анықтайды. Ол үшін олар мәліметтерді жазып, аудандық әкімдіктерге тапсырады», – деді А.Ахмеджанов.
