Шымкенттік керамика өндірісі 11 мың дауыс жинап, озып шықты

11 желтоқсан, 15:54

Шымкенттік «Зерде-Керамика» компаниясы республикалық «Алтын сапа» конкурсының онлайн-дауыс беруіне қатысып, 11 мың дауыс жинады. Сөйтіп, «Өндірістік мақсаттағы үздік тауар» номинациясында жеңіске жетті, деп жазады Elitar.kz.

«ЗЕРДЕ Керамика» - Қазақстан Республикасы аумағындағы керамогранит өндіретін, заманауи үлгідегі жалғыз зауыт.

Шымкенттік кәсіпкерлер палатасының өкілдерінің айтуынша, «Зерде-Керамика» ЖШС компаниясын конкурсқа қатысуға кәсіпкерлер палатасының экономистері кеңес берген. Компания финалға шығып, 11 мыңнан астам дауыс жинады! Ал 11 желтоқсан күні өткен «Қазақстанның үздік тауары» республикалық конкурсында «Зерде-Керамика» компаниясы орта бизнес кәсіпорындары арасындағы «Өндірістік мақсаттағы үздік тауар» номинациясында жеңіске жетті

Кәсіпорынның негізі 2015 жылы керамограниттен отандық әрлеу материалдары өндірісін жетілдіру мақсатында қаланған болатын.

Зауыт сапасы мықты керамогранит тақтайшаларының көптеген түрін шығарады.

Өндіріс итальяндық «Вагbieri&Таrozzi» компаниясының жаңа техникасымен жабдықталған. Шетелдік компания заманауи элиталы құрылыс материалдарының өндірісіне қажет жабдықтар шығару нарығында алдыңғы қатарда келеді.

Шикізатты өңдеудің арнайы жағдайы мен климаттық қалпын ескере отырып өндірісте арнайы технологиялық кешендер мен қоймалар жасалған. Бұл өндіріске қажет сапалы шикізатты дер кезінде дайындауға мүмкіндік береді.