Түркістан облыстық полиция департаментінің мәліметінше, Ордабасы АПБ-не орталық ауруханадан арыз келіп түскен. Онда ауруханаға қарасты медициналық бекеттің фельдшер бөлмесінде орналасқан компьютерді жанындағы барлық құрылғыларымен ұрлап кеткендігі көрсетілген. Жәбірленуші тарапқа келтірілген шығын көлемі 100 000-нан астам теңгені құрады. Аталған жайт Ордабасы АПБ-нің сотқа дейінгі тергеп-тексерудің бірыңғай тізіліміне енгізіліп, ҚР ҚК-нің 188-бабы бойынша тіркелген. Аурухана ішінде орын алған ұрлықтың ізін суытпай ашу мақсатында аудандық полицейлер тез арада оқиға орнына жетті. Арнайы жедел-тергеу тобы құрылып, тәртіп сақшылары ұрлық болған жерді мұқият тексеріп, саусақ іздерін алды, куәлерден сұрастырды. Алынған саусақ іздері арқылы күдіктінің жеке басы анықталды.
"Күдікті Шымкент қаласының тұрғыны болып шықты. Полицейлер күдіктіні өз үйінен ұстады. Айғақты зат ретінде күдіктінің үйінен ұрланған компьютер табылып, тәркілеп алды. Алынған айғақты заттар заңды иесіне қайтарылды. Тергеу барысында күдікті бұған дейін жаңадан салынған медициналық бекеттің құрылыс жұмыстарын жүргізген жұмысшы болғаны белгілі болды. Сол кезде соңғы үлгіде жаңадан әкелінген компьютерге көзі түскендігі анықталды. Ойға алған арам ойын іске асыру мақсатында терезені бұрағышпен (отверка) бұзу арқылы кіріп, ұрлыққа түскені айқындалды. Күдіктінің бас шарасы «қолхатта». Қазіргі таңда сотқа дейінгі тергеу амалдары жүргізілуде.
