Оқиға Павлодардағы дүкендердің бірінде демалыс күндері болған, деп хабарлайды облыстық Полиция департаментінің баспасөз қызметіне сілтеме жасай отырып Elitar.kz.
Өзіне ұнаған бірнеше көйлекті таңдап, киіп көру бөлмесіне кіріп кеткен бойжеткен ол жақтан көйлектердің өлшемі сай келмегенін айтып шығып кетеді. Дүкен иесі екі көйлектің жоқтығын тек кешкісін біліп, полицейлерге арыз түсірген. Келген шығын - 25 мың теңге.
Тәртіп сақшыларының жедел жүргізген шарасы барысында күдікті ұсталды. Азаматшаның бұған дейін де тура осы тектес ұрлық әрекетімен істі болғаны анықталды. Айтуынша, 25-тегі ару сүйіктісімен кездесуге әдемі боп киініп бару мақсатында қылмысқа барыпты. Қазіргі таңда бұл іс бойынша сотқа дейінгі тергеу жүріп жатыр. Ұсталған бойжеткеннен бұлтартпау шарасы бойынша ешқайда кетпеу туралы қолхат алынған.
