Түркістан облысының полицейі аязды күні жолда қалған көліктер мен жолаушыларға алғашқылардың бірі болып көмекке келді.
Созақ аудандық полиция бөлімі ЖПҚ учаскелік полиция инспекторы полиция аға лейтенанты Марат Тукушев желтоқсан айының 21-22-сінде қар қалың жауып, боран болғаннан кейін, өзіне белгіленген аймақ Шолаққорған-Шымкент-Екпінді тас жолы бойында жүре алмай тұрған 10 шақты көлікке қолғабыс етті. Көлік құралдарына техникалық көмек қажет болған азаматтарға да жәрдемдесті. Оған қоса, аязда қалған азаматтарды үйлеріне аман-есен жетулері үшін барынша мүмкіншіліктер жасады. Бұл туралы облыстық Полиция департаментінің баспасөз қызметі хабарлады.
"Одан бөлек тәртіп сақшысы 20-ға жуық жолаушысы бар Созақ ауданынан Шымкент қаласына шыққан автобустағы жолаушыларды жылыту бекетіне жеткізген. Аязды ауа райында осындай көмекті қажет ететін жандар көптеп кездеседі. Сол себепті аяқ асты, көктайғақ салдарынан орын алатын жол апаттарын болдырмау мақсатында, полиция аға лейтенанты Марат Тукушев сол мезетте жолды қардан тазартатын 2 техниканы шақыртып, құм септіру жұмыстарын ұйымдастырды. Шолаққорғанның бет шымылдатқан аязды күні жолаушылардың жағдайын жасады. Мұндайды күтпеген жолға шыққан жандар тәртіп сақшысына риза болып, алғысын жаудырды" делінген департамент мәліметінде.
