9 маусымда өтетін кезектен тыс Президентік сайлауға кандидаттарды тіркеу 11 мамыр күні сағат 18.00-де тоқтатылады. Бұл туралы ҚР Орталық сайлау комиссиясы төрағасының орынбасары Константин Петров мәлімдеді, деп хабарлайды Elitar.kz.
Кандидаттарға қандай талаптар қойылады?
Үміткер ретінде тіркелу үшін ұсынылған тұлға 2019 жылдың 1 сәуіріндегі жағдай бойынша өзінің және жұбайының кірістері, мүлік туралы декларациялар тапсырғаны жөнінде мемлекеттік кіріс органының анықтамасын тапсыруы қажет. Сонымен қатар өзінің денсаулық жағдайы туралы медициналық қорытындыны да өткізуі тиіс. Егер тапсырылған декларацияда қандай да бір жалған мәлімет табылса, Орталық сайлау комиссиясындағылар кандидатты тіркеу күшін жоя алады. Сондай-ақ, Мемлекет басшысы лауазымынан үміткерлерді қолдау сайлаушы санының кем дегенде 1 пайызының қолдары жиналғанда расталады.
Айта кетейік, ағымдағы жылдың қаңтар айының 1-жұлдызындағы мәлімет бойынша, 11 814 019 қазақстандық сайлаушы тізіміне енген. Демек, кандидатты қолдау үшін 118 140 сайлаушының түпнұсқалы қолы жиналуы тиіс. Ал қол жинау жұмысын әр кандидаттың сенім білдірген адамдары ұйымдастыратын болады.
Еске салсақ, біз бұған дейін Президенттік сайлауға түсетін әрбір кандидат 2 млн 125 мың теңге жарна төлеуі тиіс екенін жазған болатынбыз.
