Президент Тоқаев: "Ұйықтап қалмау керек"

Мемлекет басшысы алдымен Қ.А.Ясауи кесенесіне ат басын бұрып, «Әзірет Сұлтан» қорық-музейін жаңғырту жоспарымен, сондай-ақ «Ұлы Дала елі» орталығы, облыстық әкімдік пен басқармалар ғимараттарының, Конгресс холл, Медиа орталықтың құрылысымен танысты.

Мемлекет басшысы одан өзге жуырда ғана тұсауы кесілген облыстық «Жастар ресурстық орталығына» барды.

Қасым-Жомарт Кемелұлы орталықта «Жастарға қызмет көрсету», «Еріктілер клубы», «Жас сарбаз», «Тілдер мектебі» және «Stem» жобаларымен де танысып, «TURKISTAN HUB» коворкинг орталығының резиденттерімен кездесті.

Президенттің Түркістан қаласындағы сапары «Нұрлы жер» бағдарламасы бойынша салынып жатқан тұрғын үйлердің құрылысымен танысуымен жалғасты. Жалпы аумағы 96 200 шаршы метрді құрайтын 1560 пәтерлік 26 көпқабатты тұрғын үй ағымдағы жылы ел игілігіне тапсырылады.

Кейінірек Мемлекет басшысы Түркістандағы мәдениет үйінде жиын өткізді.

"Мен Елбасының ісін жалғастырамын. Нұрсұлтан Әбішұлының стратегиялық жоспары елді дамуға бастайды. Қазір әлем болашағы бұлыңғыр. Ұйықтап қалмау керек. Әлем халықтары дағдарысты бастан кешіруде... Қоғамда әділеттілік деген басты назарда болу керек. Әділеттілікті атқаруды билік орнатуы тиіс. Сот, прокуратура ең алдымен азаматтар құқығын қорғауы тиіс",-деді Президент.

Айта кетейік, Қасым-Жомарт Тоқаев кезекті сапарын Шымкент қаласына жасайды.