Бүгін Ақордада Корея Республикасының Президенті Мун Чжэ Инмен келіссөздерден кейінгі бірлескен мәлімдеме барысында ҚР Президенті Қасым-Жомарт Тоқаев қандай мәселелерді талқылағандарын айтты, деп хабарлайды Elitar.kz.
Қазақстан Президенті Қасым-Жомарт Тоқаев Оңтүстік Корея басшысымен келіссөздер жүргізу барысында саяси, сауда-экономикалық, инвестициялық және мәдени-гуманитарлық салалар бойынша екіжақты қарым-қатынастардың қазіргі ахуалы мен перспективаларын, сондай-ақ, бірқатар аймақтық және халықаралық өзекті мәселелерді талқылады.
«Жаңа ғана біз Президент Мун Чжэ Инмен мазмұнды келіссөздер жүргізіп, екіжақты іс-қимылдардың өзекті мәселелерін талқыладық. Күнтәртібіндегі халықаралық және өңірлік мәселелер бойынша пікір алмастық. Іс жүзінде талқыланған барлық тақырыптар бойынша өзара түсіністік пен қолдау көрсету жөнінде келісімге келгенімізге қуаныштымын»,- деді ҚР Преиденті.
Сондай-ақ,
ҚР Президенті бүгінгі келіссөздер
барысында сауда-экономикалық
қатынастар туралы да айтылғанын
әңгімеледі. Бұл тұрғыда
2019-2022 жылдарға арналған «Самал жел»
атты жаңа экономикалық ынтымақтастық
бағдарламасы іске асырылатын
болады.
«Бүгінде біздің елдеріміз машина жасау, құрылыс, жол, инфрақұрылым, ауыл шаруашылығы, қаржы секторы, денсаулық сақтау, ақпараттық-коммуникациялық технологиялар сынды түрлі салаларда ірі жобаларды жүзеге асырып жатыр. Корейлік компаниялардың бірлескен жобаларды жүзеге асыруға зор қызығушылық танытып отырғандығы қуантады. Бүгінде 500-ден астам бірлескен қазақстандық-корейлік кәсіпорын Қазақстан аумағында белсенді жұмыс жасап жатыр. Меніңше, келешекте олардың саны арта түсетін болады»,-деді Қ.Тоқаев.
Корея басшысының сапары барысында екі елдің іскер топтарының 300-ге жуық өкілдерінің қатысуымен Қазақстан-Корея инвестициялық форум ұйымдастырылады. Оның барысында өнеркәсіп, цифрландыру, инфрақұрылым және медицина салалардағы Қазақстан-Корея бірлескен инвестициялық жобалар мен бастамалар көрмесін өткізу жоспарланған.
