Түркістан облыстық Полиция департаменті Криминалдық полиция басқармасының қызметкерлері мегаполис тұрғындарын Шымкентте қолға түсірді.
Облыстық Полиция департаменті баспасөз қызметінің мәліметінше, тамыз айының басында Сарыағаш аудандық ПБ-на Ресей Федерациясының азаматы арызданған. Ол Жібек жолы ауылының автотұрағынан «Тойота Ланд Крузер 200» маркалы автокөлігін ұрлап кеткенін айтқан. Жәбірленушіге 20 миллион теңгеден астам шығын келген.
Қылмысты ашу мақсатында Криминалдық полиция және тергеу бөлімінің тәжірибелі қызметкерлері қатарынан жедел-тергеу тобы құрылып, қылмыс орны мен бейнебақылау камералары мұқият тексеріліп, куәгерлерден сұрақ-жауаптар алынған.
"Тәртіп сақшылары күдіктілердің ізіне түсіп, олар Шымкент қаласында ұсталды. Қолға түскен екі ағайынды жігіт мегаполис тұрғындары екені белгілі болды. Сондай-ақ, көп ұзамай-ақ Қарағанды қаласынан ұрланған көліктерді сатып алған азамат та қамауға алынды. Аталған жайт Сарыағаш ПБ-да ҚР ҚК-нің 188-бабы "Ұрлық" бойынша тіркеуге алынып, қылмыстық іс қозғалды. Қазіргі уақытта күдіктілер Түркістан облысына жеткізілді. Бұл қылмыстық топтың басқа да қымбат көліктер ұрлығына қатысы бар болуы мүмкін. Ұсталған үш күдікті де қамауда. Сотқа дейінгі тергеу амалдары жүргізілуде" делінген хабарламада.
