Зейнеткердің туыстары алғашында аналарының із-түзсіз жоғалып кеткенін айтып шағымданған.
Сарыағаш АПБ-нің кезекші бөліміне Қазығұрт ауданының тұрғыны арызданып, осы жылдың маусым айында Сарыағаш ауданының бір ауылында тұратын анасы жұмбақ жағдайда жоғалып кеткендігін көрсеткен.
Полиция бөлімінен криминалдық полиция мен тергеудің тәжірибелі қызметкерлерінен арнайы жедел-тергеу тобы құрылды. Жоғалған зейнеткерді іздестіру жұмыстарына криминалистер мен учаскелік инспекторлары да жұмылдырылды. Тәртіп сақшылары жақын маңдағы барлық жерлерді аралап, қандай да бір ақпарат бере алатын куәгерлерден сұрастырып, басқа да қажетті жедел іс-шаралар кешенін жүзеге асырады. Сонымен қатар жоғалған әйелдің бір өзі тұратынын ескере отырып, жедел уәкілдер оның барлық байланыстарын, сондай-ақ соңғы уақытта кімдермен қарым-қатынас жасағанын анықтады.
Полицейлер қарт әйелді іздестіруді тоқтатпады, келіп түскен барлық ақпаратты мұқият тексеріп шықты. Сонымен қатар, егде әйел адам өлтірудің құрбаны болуы мүмкін деген болжам да жасалды. Із-түзсіз жоғалған адамды іздестіру облыстық полиция департаменті басшылығының ерекше бақылауында болды. Бір ай бойғы сәтсіз іздеуден кейін Сарыағаш АПБ-де ҚР ҚК-нің 99 бабы "Адам өлтіру" бойынша сотқа дейінгі тергеу амалдары басталды. Одан әрі тәртіп сақшылары із-түзсіз жоғалған адамның орналасқан жерін анықтау бойынша жедел-іздестіру іс-шараларын жалғастырды.
"4 айдан кейін жедел-іздестіру іс-шаралары барысында криминалдық полиция қызметкерлері зейнеткердің жоғалуына қатысы бар күдіктінің ізіне түсті. Ол Сарыағаш ауданында жәбірленушімен көрші үйде тұрған, Қазығұрт ауданының тұрғыны болып шықты. Күдіктінің айтуы бойынша, зейнеткер әйел екеуінің арасында қарыз салдарынан жанжал туындаған. Жанжал барысында күдікті әйелді өлгенге дейін ұрып-соғып, денесін өз үйінің ауласына көміп тастаған. Полиция қызметкерлері із-түзсіз жоғалған адамның мәйітін аталған жерден тауып, оны сараптамаға жіберді" делінген Түркістан облыстық полиция департаментінің баспасөз қызметі берген хабарламада.
Қазіргі уақытта аталған жайт бойынша ҚР ҚК 99-бабы "Адам өлтіру" бойынша сотқа дейінгі тергеу амалдары жүргізілуде. Күдікті қамауға алынды. Полиция қызметкерлері болған қылмыстың барлық мән-жайын анықтау үстінде. Арнайы сараптамалар тағайындалды.
