Түркістан облысының полицейлері Ламар атты иттің көмегімен Қазақстан территориясына есірткіні заңсыз алып өтпекші болған азаматты құрықтады, деп хабарлайды ТО ПД баспасөз қызметіне сілтеме жасай отырып Elitar.kz.
2019 жылдың 29 маусымында түнгі сағат 1-лер шамасында «Атамекен» кедендік бақылау бекетінен полицейлер «Нексия» көлігін тоқтатады. Полицейлер көлік жүргізушісінің құжаттарын тексеру барысында сақшыларға серік болған кинолог маманның Ламар атты иті тынымсызданып, көлікке ұмтылып, иесіне белгі береді. Осылайша тәртіп сақшылары көлікке қарай Ламарды босатады. Тәжірибелі ит көліктің астыңғы жағынан «багке» жапсырылып жасалған құпия темір қалтаны табады.
Бұл жайт бірден Мақтаарал АПБ-не ҚР Қылмыстық кодексінің 286-бабымен «Айналыстан алып қойылған заттардың немесе айналысы шектелген заттардың контрабандасы» бойынша сотқа дейінгі тергеп-тексерудің бірыңғай тізіліміне тіркеуге алынды.
Тергеу барысында белгілі болғандай, ұсталған азамат Тәжікстан азаматы болып шықты. Күдікті бұрын-соңды сотты болмаған, отбасылы. Одан айғақты зат ретінде есірткі жасырынған көліктің «тайнигі», есірткі тектес зат салынған 2 орама алынды. Табылған орамалар сараптамаға жіберіліп, нәтижесінде 2 кг «героин» екендігі анықталды. Күдікті өзінің танысының тапсырысы бойынша есірткіні шекарадан алып өтпекші болған. Еңбекақысы ретінде танысынан қомақты қаржы алатын болып келіскен.
Қазіргі таңда күдікті азамат уақытша қамауда. Оған қатысты тергеу амалдары жалғасуда.
