Сайлау: үгіт-насихатқа қатысты бірқатар заң бұзушылықтар анықталған

09 маусым, 18:48

Бұл туралы 8 маусымда Орталық сайлау комиссиясында өткен жиында бас прокурордың орынбасары Болат Дембаев айтты.

11 мамыр күні елде сайлау алдындағы үгіт-насихат кезеңі басталған. Үгіт жүргізу жұмыстары 7 маусым түнде аяқталады. 8 маусым – сайлау алдындағы тыныштық күні.

Соған қарамай билік өкілдері бірнеше заң бұзушылықтарды анықтаған. Прокуратура сайлау алдында заңсыз сауалнама жүргізу бойынша жеті әкімшілік іс қозғаған. Дембаев «бес жыл тәжірибесі бар компаниялар ғана сауалнама жүргізе алады. Сауалнама жүргізер алдында Орталық сайлау комиссиясынан жазбаша рұқсат алу керек» дейді.

Бас прокурор орынбасары Дембаев науқан кезінде үгіт-насихат материалын әдейі бүлдіргені үшін Нұр-Сұлтан тұрғынына 15 айлық есептік көрсеткіш (37800 теңге) көлемінде айыппұл салынған.

"Кандидаттан немесе оның сайлауалды штабынан шағым түскен жоқ" деді Дембаев. Прокуратура өкілі үгіт материалдары бүлінген кандидаттың есімін атамады.

Болат Дембаевтың сөзінше, тыйымға қарамастан, белгілі бір азаматтар үгіт-насихатты жасырын түрде жүргізуде.

"Азаматтар сайлауға қатысып, кімге дауыс бергенін суретке түсіріп жататын жағдайлар кездеседі. Ол дегеніміз нағыз үгіт-насихат болып саналады" , - деді ол.

Сондай-ақ, кейбір тұлғалар заңмен тыйым салынған комиссия отырысының протоколын желіде жариялап жіберген.

"Протоколдарды сайлаудың толығымен аяқталуына, сағат 20:00-ге дейін жариялауға болмадйы. Бұл мәселе жеке, заңды және бақылаушы тұлғаларға тікелей қатысты ", - деді ол.

Бұл жағдайларға қатысты терксеріс жұмыстары жүріп жатыр.

Тегтер: Қазақстан жаңалықтары