Түркістан облыстық мәслихатында сайлаушылары Шымкентте қалып қойған 7 бірдей депутат бар. Олардың әлі күнге дейін өз мандатынан бас тартпауы қаншалықты заңды? Elitar.kz тілшісі бұл сұраққа жауап іздеп көрді.
2016 жылдың 20 наурызында сол кездегі Оңтүстік Қазақстан облыстық мәслихат депутаттығына Шымкент қаласынан 14 халық қалаулысы сайланды. Бірнеше жыл өткен соң ОҚО Түркістан облысы болып қайта құрылды. Шымкент еншісін алып шыққан соң сайлаушылары мегаполисте қалып қойған 14 депутаттың жетеуі мандатынан бас тартты. Олар: танымал кәсіпкер Қайрат Молдасейітов, Рәшкүл Оспанәлиева, Бакарам Абдукаримов, Арман Берденов пен Жұмағали Білісбеков, Қилыбек Тұрлыбек, Нұрмахан Жолдасов.
Ал, Шымкентте қалған сайлаушыларының аманатын Түркістанға алып кетпесе де , "халық қалаулысы" деген атақта арқалап, Түркістан облысының мәслихатында жүргендері қайсы?
Жалпы депутаттың сайлаушылары бір жақта, ал мәслихат өзге территорияда болуы қаншалықты дұрыс? Шымкент қалалық мәслихатының депутаты Нұрғазы Бқхарбаев мұның қисынға келмейтініне тоқталып, заңда көрсетілген ережелерді де атап өтті. Ал Түркістан облыстық мәслихатының хатшысы Қайрат Балабиев болса, бұл жағдай заңға қайшы емес деп отыр. Тіпті олар Түркістанда жүріп те Шымкент билігіне сауал тастап, сайлаушылар мәселесінің шешілуіне мұрындық бола алады екен.
Шымкентте қалған сайлаушылардың кейбірі облыстық мәслихатқа сайлаған депутаттарының түрін саяси науқаннан соң бір рет те көрмегенін айтады. Шымқалада жүргенде төбе көрсетпей, Түркістанға табан тіреген депутаттарын тіпті танымайтындары да бар. Сәті түсіп, кездесіп қалсақ, шемен болған шерін ақтарып алу армандары.
Көрнекі фото: operkor.wordpress.com
