Бұл туралы Түркістан облысының әкімі Арыста өткен жоспарлы аппараттық жиында айтты.
Арыс қаласын қайта қалпына келтіру жұмыстарына қатысқан бірнеше сектордың құрылысшылары жұмыстарын уақтылы аяқтап, елдеріне қайтып жатыр. Ол секторлардың барлығында күрделі жөндеу жұмыстары толық аяқталған.
Жиында Арыста атқарылып жатқан жұмыстар мен жол, кәріз жүйесі мен құжаттандыру мәселесі жайлы соңғы мәліметтер сөз болды. Жарылыстан 8 мыңнан астам тұрғын үйдің 7634-і зақымданған болса, оның 500-ге жуығы мүлдем жарамсыз күйге түскен болатын. Ал, толық сүріліп тастап, қайта көтерілген нысандардың тізімінде көпқабатты үш тұрғын үй бар. Олардың құрылысы аяқталуға таяды.
Түркістан облысы әкімдігінің басасөз қызметінің мәліметінше, қазір ішкі әрлеу жұмыстары жүріп жатыр. Аталған жұмыстарға облыс бойынша 3 мыңға жуық адам тартылды.
«Үш айда толық жаңарған Арыс қаласында жүргізілген ауқымды жұмыс бәріміз үшін бұрын соңды болмаған баға жетпес тәжірибе болды. Аз ғана уақытта тұтас бір қаланы қайта аяққа тұрғызу тарихта болмаған. Бұл еліміздегі бірлік пен ынтымақтастықты айшықтайтын көрініс. Мұндай жағдай енді қайтып басымызға түспесін», - деді облыс әкімі Өмірзақ Шөкеев.
Бұдан өзге жиында Түркістан қаласының әкімі Рашид Аюпов көне шаһардағы құрылыс жұмыстарын баяндап өтті.
"Бүгінде облыс орталығы 16 секторға бөлініп, оларға облыстың басқармалары мен аудан-қалалары, қалалық әкімдіктің бөлімдері жауапты болып бекітілген. Әкімнің айтуынша, барлық аумақтардың жұмыстары тынымсыз жүргізіліп жатыр. Бұл ретте Өмірзақ Шөкеев қала басшысына халықпен жұмыс істеп, тазалық пен тәртіпті басты назарда ұстауды тапсырды. Түркістан қаласын көркейту жұмысын бақылау облыс әкімінің орынбасары Ұлан Тәжібаевқа жүктеді" делінген баспасөз қызметінің хабарламасында.