ҚР Премьер-министрінің Түркістанға жасаған жұмыс сапары соңында Түркістан қаласының 2019–2020 жылдарға арналған кешенді құрылыс және дамыту жоспарын іске асыру мәселелері жөнінде жұмыс кеңес өтті. Жиында Өмірзақ Шөкеев баяндама жасады, деп хабарлайды Elitar.kz тілшісі.
Түркістан облысының әкімі құрылыс, тарихи- мәдени нысандарды реконструкциялау, тұрғын үй, жолдардың сапасын арттыру, инженерлік-коммуникациялық инфрақұрылым жүргізу, туризм, ауыл шаруашылығы салаларын, арнайы экономикалық аймақты дамыту қарқындары туралы баяндады. Өз сөзінде облыс басшысы әлі құрылысы басталмаған нысандарды тізіп шықты. Мәселен, тұрғын үй кешені (Хайвилл) мен қазпошта (Самұрық Қазына) нысанының құрылысы әлі басталмаған. Одан өзге Түркістанда құрылысы баяу жүріп жатқан нысандар да бар. Олар: музыкалық мектеп, жабық бассейні бар спорт кешені, олимпиадалық резервтегі спорт мектебі мен туризм бағытындағы коллдеж ғимаратының құрылысы.
Рухани-мәдени орталықта тоғыз нысан салынып жатқан болса, оның үшеуі кестеге сай жүріп жатыр.
Олар: Қ.А.Ясауи мұражайы мен музыкалық су бұрқақ, қабылдау орталығы. Ал үш нысанда (неке сарайы, сауда орталығы, Ұлы дала елі орталығы) құрылыс жұмыстары әлі күнге дейін басталмаған.
Тұрғын үй құрылысы Түркістанда 52 тұрғын үй құрылысы жүріп жатыр. Жыл соңына дейін 42 тұрғын құрылысы аяқталады.
Жүріп жатқан жұмыстарды баяндаған Өмірзақ Шөкеев Үкімет басшысынан қолдау да сұрады. Атап айтқанда, Түркістан қаласының шығыс аумағынан жаңа айналма жолды қарастыру жобасы. Бұл бойынша Индустрия және инфрақұрылымдық даму министрлігіне ұсыныс жолданып та қойған. Тек әзірге қолдау болмай тұр екен. Екінші мәселе: әуежайға салынатын автомобиль жолынан "Кентау" индустриалды аумағына баратын жол құрылысы.
"Қазіргі таңда, әуежайға баратын 15,2 шақырым жолдың технико-экономикалық негіздемесі мен жобалау-сметалық құжаттамасы әзірленуде. Шаға ауылы тұсынан әуежайға салынатын автомобиль жолынан Қосқорған ауылы арқылы тікелей Кентау қаласындағы индустриалды аймаққа дейінгі жалпы ұзындығы 24 шақырымды құрайтын жол құрылысын жүргізу жоспарлануда. Бұл бағыт арқылы жүк көліктері Түркістан қаласы аумағына кірмей тікелей индустриалды аумаққа қатынайтын болады. Аталған жол құрылысы Түркістан облысының 2024 жылға дейінгі әлеуметтік-экономикалық даму кешенді жоспарына өзгеріс енгізу барысында қарастырылды. Жобаны қолдауыңызды сұраймын",-деді Өмірзақ Шөкеев.
