Жарылыстан соң қауіпсіз аумаққа эвакуацияланған Арыс тұрғындары Шымкентте наразылық шараларын ұйымдастырды. Ақмешіт мешітінің алдына жиналып, биліктен Шымкент немесе Түркістан облысының өзге аумағынан үй салып беруін, жер телімін бөлуін талап етті. Олар Арысқа қайта оралмаймыз деп бекініп отыр. Бірнеше сағатқа созылған наразылық шеруі әлі де тоқтамады.
Түркістан облысында өткен брифинг кезінде облыс әкімі Өмірзақ Шөкеев халықтың бұл талабын қисынсыз деп атап, мұндай әлдекімдердің провакация жасағысы келгенін айтты.
«Кейбір азаматтар осы сын сағатты пайдаланып провакация жасағысы келеді. Оған жол бермеу керек... Неше түрлі қисынсыз талаптар қойдыртып провакаторлар... Тұрғындардың Арысқа бармаймыз, басқа жерден үй салып беріңдер деген талаптары қисынсыз. Оған ешкім еш уақытта бармайды. Сондықтан сүйікті Арысқа келіп, бірге көркейтейік. Арыста енді мұндай апатты жағдай болмайды»,-деді аймақ басшысы.
Айта кетейік, Арыста жарылыс кезінде зақым келген нысандар мен үйлер бір айдың ішінде қалпына келтірілетін болды.
