19 тамыз, 16:00
Жеке үйден шыққан жалыннан 44 жастағы әйел мен бала өртеніп кете жаздады. Зардап шегуші түскі ас дайындаған соң баласының жанына жатып, ұйықтап кеткен деп хабарлайды ШҚО ТЖД сілтеме жасаған Elitar.kz.
"44 жастағы ауыл тұрғыны түскі ас дайындаған, содан соң төрт жастағы қызының жанына жатып, ұйықтап қалған", - делінген ведомство хабарламасында.
Оқиға 18 тамызда Ұлан ауданындағы Пролетарка ауылында болған. Өртті бірінші болып байқаған кішкентай қыз оянып, анасын тұрғызған. Баласы оятқан соң есін жиған әйел өз-өзіне келіп, қызын алып үйден шықпақ болыпты. Алайда, өрт ас үй мен дәлізді шарпып алған соң, есікке жақындау мүмкін болмаған. Өзі мен баласын құтқаруға тырысқан әйел үйдің терезелерінің бірін сындырып, қызын сыртқа шығарып үлгерген. Зардап шегуші түтіннен уланып, есінен танып қалған. Үйге кірген ауаның күшімен от одан әрі қатты жанған. Сынған терезелердің дауысы көрші тұратын ер адамдардың назарын аударған. Сөйтіп, көршісі әйелді құтқаруға келген. Ол сынған терезеден кіріп, көршісін сыртқа шығарыпты. Артынша, зардап шегушіні ауыр хәлде шұғыл ауруханаға жеткізген. Қазіргі таңда ол токсикология бөлімінде жатыр.
Ұлан ауданы Төтенше жағдайлар бөлімінің инженері Ерасыл Қадырбековтың айтуынша, өрт сөндірушілер оқыс оқиғамен арасы 20 шақырым болатын көрші Таврия ауылынан барған. Өрт сөндірушілер жалын орнына келгенде, өрт бүкіл үйді қамтыған. Өртті сөндіруге 2 сағатқа жуық уақыт кеткен. Ал жалын 135 шаршы метр аумақты қамтыған.
Әзірге өрттің нақты шығу себебі белгісіз. Алайда, зардап шегуші қыздың айтуынша, ұйықтар алдында анасы плитаға түскі асы бар кәстрөлді қойған. Алдын ала мәлімет бойынша, өрт ас үйден шыққан. Кішкентай қыз әкесімен бірге көршілерінің үйіне уақытша қоныстанды.
