Шымкент қаласының әкімі 2020 жылы Әбу Насыр Әл-Фарабидің хит өлеңдері қазақшаға аударылатынын айтты, деп хабарлайды Elitar.kz.
Бұл туралы әкім Ерлан Айтаханов "Болашақ" ұйымының ұйытқы болуымен "Жастар саясатының маңызды трендтері" атты кездесуде мәлімдеді.
«Келер жылы ұлы Абайдың 175 жылдығы атап өтіледі. Үлкен дайындық жұмыстары жүріп жатыр. Оған жастар да атсалысуы керек деп ойлаймын. Сонымен қатар келесі жылы Әбу Насыр Әл-Фарабидің 1150 жылдығы тойланады. Оның еңбектерін елдің, әлемнің бәрі біледі. Керек десеңіз, ол нотаның авторы. Сіздер Әл-Фарабидің өлеңдері болғанын білесіздер ме? Өкінішке орай, оның бірде-бірі қазақ тіліне аударылмаған. Отырар ауданында әкім боп істеп жүргенімде оның өлеңдерін қазақ тіліне аудару мәселесін қолға алған болатынбыз. Ол жұмыстар жалғасын тауып жатыр. Келесі жылы барлығы болмаса да, хит өлеңдерін қазақ еліне паш етеміз деген жоспарымыз бар»,-деді Шымкент әкімі.
Айта кетейік, еркін форматтағы кездесуге Шымкент қаласынан бөлек, Түркістан, Жамбыл, Қызылорда облысының белсенділері қатысты.
